Maleficent

我:「雲姨姨話Maleficent好好睇, 佢話Maleficent其實係好人嚟架, 又有Aurora公主喎, 你都話同學仔去睇完話唔驚, 不如我哋去睇囉?」
(好hard sell... , 好明顯係我想睇, 不過怕阿囡會驚... ）

囡:「唔係呀，你睇吓呢度, Maleficent係壞人嚟架。」
我:「........」

我:「係咩? 邊度有講佢係壞人呀?」( 扮無知)
囡:「Maleficent is a bad fairy.」
我:「係咩意思呀?」
囡:「Maleficent 係壞天使, 即刻壞人囉。.」
(真係知架喎!)

叩門遊戲...續

無預計過1-1-1叩門會連interview機會都無... 不過聽完講座, 都幾合理, 大家理念原來唔太相同, 似乎係我當初有所誤解, 中伏...!

我:「我叩咗一號學校, 但佢唔開門俾你入去玩添。」
囡:「你再叩啦。」
我:「我試過打電話, 同去學校大大力敲佢度門架啦, 佢都係唔開門喎, 我都無辦法, 呢個遊戲係咁, 可以唔開門架。」
囡:「咁咪無得同小丸子一間學校?」
我: 「就係囉。但係唔緊要啦, 其他學校一樣有同學仔一齊架嘛, 二號學校有多多, 三號學校有徐B。」
囡:「好嘢, 多多!」
囡:「我唔鍾意三號學校。」
c, 我講錯乜呢....
我: 「點解呀?上次面試遊戲個老師幾好笑喎, 我都鍾意嗰度呀。」
囡:「我唔鍾意三號學校。」
我:「哦, 原來係無得解嘅。」
囡:「....」
(唉! 又要剔走一間, 買少見少... )
我: 「等我問吓四號學校, 聽日可唔可以去玩先。」
其實有講座, 一定可以去, 打個電話去登記就得架啦!
我: 「四號學校開咗門, 請你聽日去玩喎。」
囡:「好嘢!」
我: 「可能鄺老師都喺度。」(上星期玩完話好鍾意鄺老師)
囡:「好嘢, 鄺老師!」

疑似電話騙案

疑似騙子:「係咪xxxx字頭電話, 打過俾我。」(有來電顯示嘅香港電話號碼, 似住宅號碼)
我:「我揾K。」
(啱啱打過電話俾朋友K揾唔到, 以為佢飛咗線返屋企, 佢奶奶見到missed call回電)
疑似騙子:「你係邊個。」
我:「我其實係揾K。」
(我講你都唔識我架啦!)
疑似騙子:「我係K呀。」
(吓?! 我無耳鳴同幻聽喎, 把聲老過K好多, 一定唔係啦!)
我:「你唔係K喎, 把聲都唔似。」
疑似騙子開始agressive:「我係K呀, 你係邊個?」
我:「...」
疑似騙子繼續:「我係K呀, 真係K, 你係邊個?」
我:「你可能真係K, 但應該唔係我要揾嗰個K。」
疑似騙子未停:「我係呀!」
我:「你當我頭先打錯電話啦!」

閃石絲帶頭箍

收到驚喜禮物, 原來係新加坡寄嚟嘅閃石絲帶, 果然知我所好!

好大圈喎, 首先整吓簡單嘢先!

面試遊戲

我:「我哋今日去A小學玩呀!」
囡:「A小學, 去咗啦, 攞咗禮物架, 唔駛去啦。」(講緊上次開放日)
我:「......」
我:「今次係面試遊戲, 唔同架喎!」
囡:「哦!」
我:「一陣帶埋本書去, 可能老師會問你睇過邊本書, 又可能老師會叫你講個故事俾佢聽。」
囡:「我帶埋本書, 俾佢睇咪得囉 。」
我:「......」
我:「老師咁忙, 邊得閒睇呀, 可能想你講俾佢聽呢。」
囡:「一本咋喎。」
我:「......」

叩門遊戲

囡:「我讀邊間小學?」
我:「未知喎!」
囡:「點解小丸子知道讀邊間嘅?」
我:「...」
我:「哦...係咁嘅... 因為佢玩完第一個遊戲, 抽到一號, 所以唔駛再玩啦。我哋抽到四號, 仲有得玩, 不過就爸爸媽媽玩咗先, 之後先到你玩。」
(上網check學校叩門時間表, 寫profile, 交表格, 等收電話interview)
囡:「哦...」(你真係明?)
囡:「咁我幾時知道讀邊間小學?」
我:「...」
我:「咁睇吓玩唔玩到去一號囉... 」
囡:「咁如果係一號, 係咪即係同小丸子一間?」
我:「係呀!」
囡:「好嘢! 同小丸子一間。」
我:「...」(你估人哋實收你咩)

識人好過識字

朋友:「聽日得唔得閒?」
我:「 要同個女去in小學, 有乜攪作?」
朋友:「老公出差, 想揾你聚吓, 我下晝得閒, 陪埋你去interview都得!」
我:「你識唔識校董?」
朋友:「唔識。」
我:「你識唔識校監?」
朋友:「唔識。」
我:「你識唔識校長?」
朋友:「唔識。」
我:「咁唔駛啦, in完打俾你!」

蝴蝶絲帶髮圈

之前整咗對公主蝴蝶絲帶髮夾俾阿囡, 我自己都幾鍾意架, 整完俾佢之後都時時戴住, 點解最近唔多覺佢戴嘅呢? 一問之下竟然話唔見咗!

用咗剩低嘅紛紅色絲帶, 加埋上次去活動嘅三色童軍扭繩, 整咗個髮圈。

公主頭箍

每個細路女總會有件公主裙, 簡直等同幼兒版婚紗晚裝....

阿囡都一樣有幾條公主裙, 有一手同二手嘅, 事實上呢類裙大部份嘅質地都係麻麻, 有得揀都唔會想買...

阿囡其中一條Cinderella裙已經唔啱著, 袖口邊位仲有少少爆開咗, 唔再傳俾第二個啦, 條裙胸口中間釘咗個公主扣, 都可以留返喎!

之前買埋一堆DIY物料, 本來想將個公主扣加喺頭箍度就算, 阿囡話唔鍾意黑色, 於是又加咗珠鏈, 望落都OK呀 (自己覺得, 哈哈!)