不過當我拎咗個箱返嚟就發現唔係咁簡單, 首先係兩個箱sizes有少少分別, 釘埋放落地唔平, 仲有個箱好多刺同釘, 唔小心好易整傷。之後放埋一邊無乜郁過, 因爲屋企其實無工具, 無乜動力繼續攪, 之前超潮濕, 個箱仲發霉添。點知某日買咗連殼嘅夏威夷果仁, 徒手完全開唔到, 去lab問同事借鎚仔, 佢居然覺得用鎚打開而唔整爛粒果仁好有挑戰性好好玩, 仲叫我有乜好玩再揾佢。我即刻諗到我個木箱, 既然有專家幫手, 可以整複雜啲, 反正呢個同事同我一樣, 遇強越強, 於是Doll House凳仔計劃就誕生啦! 兩個酒箱將會係屋, 一個箱會係睡房, 另一個係客廳, 酒箱蓋同裏面dividers會係家具物料, 夢想同現實, 遲啲先知差幾遠。
要同事幫手先可以做木工, 度好size用鋸切, 前幾日整好張床, 不過我仲想整個床頭架, 當未完成。
今日落雨天, 無得出街, 整下布藝同其他先囉。床褥用咗卡紙加泡泡紙, 都幾似喎, 床褥套、被、枕頭、枕袋都係用舊衫整架。個睡房放咗張床無乜位剩, 可能整套sofa, 加窗簾做個假窗之類就差唔多完成....
