改造牛仔裙

朝早執櫃桶時發現呢條裙, 我完全無印象有條咁樣嘅裙, 居然又可以僅僅著得落喎, 但以我呢個年紀, 點可能著佢出街....

阿囡見到條裙話好鍾意, 梗係因為有Mickey同Minnie啦, 一於改裝俾佢著!




















仲可以整隻髮夾, 不過望落麻麻, 要排隊等再改造...

閃石絲帶髮夾

真係好大圈絲帶...

整吓簡單嘅髮夾, 效果都OK喎!

小三

朋友A:「老闆件小三，吓吓當正自己係老闆娘, 真係超難頂！」
朋友B:「無辦法, 同7-11一樣, 總有一件喺左近。」
朋友A:「真係好難明白老闆同老闆娘, 老闆娘有樣有身材同有腦, 但老闆娘又似知道小三而無出聲。嗰件小三無樣無身材, 最慘係無腦, 同佢一齊做嘢嘅都嘔出幾桶血, 係咪每個男人都鍾意有個蠢女人喺身邊, 先覺得自己特別醒過人?!
朋友B:「哪, 呢句真, 你終於識諗啦... 平時公司邊有咁多問題先得架?! 就係多得有個小三整鑊粥, 老闆先有機會攪返掂, 英明神武幾多呀, 男人要出風頭嘛！」
朋友A:「....」
朋友B:「而老闆娘呢..."男人吃米飯吃多了，總想吃點麻辣煲，雖然知道那是垃圾，但就是管不住自己..."」
我:「朋友B, 你果然係高人, 你好有potential做老闆娘! 」
 

立體花蝴蝶髮夾

我一向覺得細路女夾一隻大蝴蝶髮夾喺前面好好睇,今次呢隻夾上面兩朶花係用咗recycled嘅絲帶整,襯埋白色棉線vintage絲帶幾唔錯喎！真鍾意！（又來自己讚自己:-P)

立體絲帶玫瑰髮夾

我覺得呢個玫瑰好靚, 不過都幾大朶, 無返咁上吓大嘅頭, 好難戴得起, 哈哈!

紙巾盒櫃桐

喺朋友屋企見到有個紙巾盒櫃桐, 呢個idea幾好喎, 啱啱有個幾實淨嘅鞋盒, 可以試吓整返個。本來想用唔同size嘅紙巾盒整, 但原來唔易架喎, 要將每個紙巾盒去resize先fit到入鞋盒, 真係整到嘔血...

再嚟過同一款紙巾盒去整, 容易好多, 望落仲好整齊添。

Frozen髮夾

呢排個個小朋友都中左Disney Frozen毒, 整幾隻髮夾先!

接放學

放工去接放學，一見到阿囡竟然...,
囡：「點解又係你接我？我想爹哋接我！」
我：「.......」
你估我好想嚟接你咩？！ （怒！）
我：「咁我依家走，你喺度等爹哋接你囉！」
囡：「唔好！」
我：「咁我依家走，你自己返屋企囉！」
囡：「唔好！」
對住啲自己都唔知想點嘅人, 真係好無奈!

白桃啫喱

返到屋企, 阿囡食緊啫喱, 個樣好享受吓喎。

我:「嘩! 有啫喱食咁好嘅?」
囡:「係呀! 婆婆買咗三個, 尋日爹哋食咗一個, 我食咗一個。」
我 (銳利眼光):「婆婆買咗三個, 爹哋一個, 你一個, 咁呢個係咪應該係我嘅呢?」
囡:「.... 」
繼續食, 無意識想俾返我, 對眼碌咗一陣....
囡:「我想試吓呢個味呀嘛, 尋日嗰個係提子, 呢個係桃。」
我:「但係我都想試吓架喎。」
囡 (好認真):「你下次會有機會架, 真架。」
然後繼續食...
我:「.... 」