雙色玫瑰髮夾

買咗幾隻顏色嘅綫, 試吓用兩種色整花, 紛紅襯埋啡色效果幾好喎!
呢隻夾我最常用, 貪方便嘛, 但竟然唔見咗, 周圍揾過吓架啦... 希望唔揾會自動出現返, 通常啲嘢都係咁, 否則呢張咪變咗遺照?! 睬!

花店髮夾

曽幾何時學過整蠟花, 幫襯老師買咗一埋材料, 不過好耐無整, 亦唔太記得點整, 只係記得都幾麻煩, 自己應該唔會再整。某日執屋發現咗呢埋材料, 又諗吓可以整乜呢?

之前美心蘿蔔糕廣告個細路女隻髮夾好似幾靚喎, 日日返工放工都見到張poster...

試吓整先, 加埋花店舊絲帶, 雖然同原先想像唔同, 但效果都幾好呀（自己覺得, 哈哈!), 剩係用咗好少黃色花芯材料咋, 仲有排玩！

爛地拖

工人姐姐永遠唔會主動講要買嘢, 為免佢到洗米時先話無米, 我不時要問佢駛唔駛買柴米油鹽。

最近佢放咗假, 我要做家務啦, 一拎個地拖竟然斷開兩截 。
我:「點解地拖爛咗, 姐姐都唔講俾人知架。」
囡:「佢有講呀。」
我:「幾時講過我知?」
囡:「唔係講俾你知, 係講俾我知。」
我:「....」

皇冠の失敗

姪女就快6嵗生日, 買禮物真係好好好傷腦筋, 事關伊家嘅小朋友樣樣都有, 簡直係過份豐盛添, 連我諗唔到嘅佢都有...

無意中搵到呢個皇冠, 呢個年紀嘅細路女都好鍾意公主, 一於織呢個。

 











以爲跟住instructions整無難度, 最難得係我睇得明呀嘛, 哈哈! 呢個係大人version, 我用自己嘅幼綫開始織, 跟住起一個圓圈, 啱啱fit到阿囡個頭, 應該姪女會OK。理論上照織就得, 原來唔係架, 織織吓發現唔對路,形狀扭來扭去, 拆過自己試吓改良再織, 織到好嘔血, 來來去去N次都唔成功。正想接受呢個, 我阿媽又話姪女個婆婆迷信唔鍾意白色, 結果無送出, 再改唔改良好呢?

 














然後上Facebook見到呢個.... 攞景定贈慶呀!

 

髮圏

買咗嘅綫好幼, 整大件嘢真係可以織到手軟... 之前見到年花同情人節花嘅flyers, 試吓整花都好喎!

以前覺得珍珠好老氣, 但最近竟然開始鍾意起嚟, 唔通真係反映我已經年紀大?

整咗呢個髮圏, 送咗俾我日本同事嘅女, 佢好似四嵗幾, 日本同事話佢好鍾意, 每日都要戴,我聽到梗開心啦,仲即時感覺後生返少少添, 哈哈！

婚禮晚宴禮物包裝の變身

以前參加中式婚禮晚宴, 好多時會有蜜糖做小禮物, 而呢條就係用包裝蜜糖嗰塊嘢整出嚟架啦。

Dress on Rebecca...

黑色絲帶の變身

唔記得影低條絲帶, 係純黑色好粗架, 只係用咗白色線去聯, 效果又幾好喎!

Dress on Rebecca...

6嵗牙刷

阿囡隻牙刷已經用咗好耐, 雖然無乜損耗, 但係咪都應該換過隻呢? 同佢行超級市場, 順便買返隻, 叫佢自己揀個顔色。

我:「有黃色、綠色同藍色喎!」

囡:「我要紫色。」

我:「紫色係大隻啲架, 六嵗以上, 呢隻三至六嵗 你五嵗幾咋, 呢隻先啱。」

囡:「咁好啦, 我要藍色, 咁你係咪送紫色嗰隻俾我做生日禮物。」(嘩!正呀, 送呢個做禮物)

我:「唉呀! 俾你估到添, 仲諗住俾個驚喜你架嘛。」

 

鈎織

突然心血來潮想鈎織, 以前學過放低咗, 買返少少工具, 仲買咗幾舊線, 整咗條裙, 呢個粉紫色我好鍾意。

Tube dress on Ariel...

 



BB褲加名牌繩の變身

阿囡條褲穿咗個窿仔, 仲有條唔見咗名牌套嘅名牌繩，係名字牌個名牌，唔好以爲係出名嘅名牌呀! 哈哈! 整乜好呢?

阿囡話公仔得裙無褲, 咁試吓整囉, 但整條褲又唔可以唔整件衫喎, 結果整咗呢套!

舊褲腳碎布加花邊の變身

舊褲腳碎布加花邊做到乜, 估吓? 我覺得有少少菲律賓feel。

 

 

 

係晚裝, on Rebecca....