從新出發

曾經喺Yahoo Blog寫過BB嘅生活點滴, 但佢越嚟越大個, 應該要俾返啲私隱佢, 寫自己嘅嘢更加唔想。要完全隱藏身份, 諗過寫吓笑話, 反正自己都想笑多啲, 我連Yahoo Blog個版面都改咗, 整裝待發, 點知又到Yahoo Blog要摺埋, 索性唔寫算啦。

做咗阿媽之後, 以前單身時嘅興趣活動都停得七七八八, 見阿囡嘅公仔衫爛晒, 不如幫佢整吓公仔衫同飾物, 中學嘅時候學過家政同縫紉, 當時好唔鍾意架, 我記得個老師好鬼惡, 自己又好似做極都唔夠其他人好, 後來先發現好多功課可能係家長做架。估唔到伊家就地取材, 用啲舊衫舊絲帶之類去開始, 整吓整吓又好似幾好玩, 而且可以廢物利用。我仲有四個美女模特兒添, 咪就係阿囡嗰四千金Rebecca, Lily, Ariel, 同埋Rebeccababy囉, 啲名都係阿囡改架, 佢哋嘅身材超怪, 條腰幼到無朋友, 不過我連度身都懶, 呢個唔啱第二個著。

自己整完有時好有成功感, 但係咪人哋都覺得得呢? 朋友客氣實會話好, 不如放上網睇吓, 如果完全唔認識嘅人都話好, 應該比較有代表性。但係如果被人狠批呢? 個別意見不作參考, 如果好多人都有同一意見又點呀? 咪下次改良吓囉, 雖然有壓力有動力, 但興趣嘅大前提係要輕鬆愉快嘛!