點會唔記得

有位expat同事, 退休幾年後返嚟香港公司探班, 公司真係唔少人, 又唔係個個有同佢聯絡, 真係唔知佢仲記唔記得邊個打邊個?!

A同事:「Remember me?」
Expat同事:「Sure, A!」
B同事:「Remember me?」
Expat同事:「Of course, B!」
.
.
.
.
N個同事都記得喎, 跟住齊齊吹吓水... 突然殺出個同事...

H:「Remember me?」
Expat同事:「Ah..... ehm...ooo... 」, 終於呢位唔記得...
H忍唔住講出自己個名:「H!」
Expat同事:「Oh yes, same as my dog.」

我同埋附近嘅同事實在係笑到標眼水, 最後大家都唔知Expat同事係真唔記得, 定係有心玩嘢...

小鯨魚髮夾

一共整咗六隻小鯨魚架, 不過個嘴好難整, 後面嗰幾條個樣唔多開心, 都係報喜不報憂, show開心一面算啦!

刷牙故事卡通

囡:「媽咪, 斑馬頭先講無禮貌嘅說話呀!」

睇緊刷牙故事卡通, 點會有無禮貌嘅說話呢??!!

我:「斑馬講乜嘢無禮貌嘅說話呀?」
囡:「斑馬話飲尿。」
我:「斑馬話飲料呀, 同音字嚟架。」
都唔明點解呢個年紀嘅細路, 對屎尿屁特別有興趣! (汗!)

Time Management

最怕我家工人姐姐慢條斯理, 完全無時間觀念, 就算搭飛機返老家, 都係唔到最後一秒唔出門口。我不時都諗, 出得嚟行, 預咗要還...

偏偏佢次次基本上都趕得到, 無大問題, 但就攪到我神經衰弱!

正所謂針唔拮到肉唔知痛, 係咪應該要用有效啲嘅方法, 齋talking都係無用, 左耳入右耳出, 話極唔聽! 係咪應該扣佢人工?! 點知我突然醒起... 呢個月唔記得咗出糧! Ohhhh...

Princess Cinderella

我真係覺得公主唔係幾靚...

奈何阿囡要整, 今朝睇佢整辛苦過自己整, 最後佢又唔成功, 為咗唔想再睇住佢整, 索性等佢訓咗我自己整, 無淺藍色, 唔夠肉色, 我呢個公主條裙深色咗, 對手套長咗, 同埋做咗瘦面。

橡根手鍊 take four

阿囡臨訓前要整手鍊, 仲要自己上網揀, 最後選中呢條有七彩顏色, 小朋友都係鍾意五顏六色。整整吓斷橡根, 要幫佢補救, 好彩都明白咗個原理, 無問題, 攪得掂唔駛由頭再開始。

公主蝴蝶髮夾

見到公主絲帶, 我估我囡一定鍾意, 買咗先諗吓整乜。

諗來諗去, 都係整蝴蝶結架啦.... 但普通蝴蝶結好似唔係好靚, 不如整個八字蝴蝶, 次次都係見人整就易, 自己整又唔係咁易, 點整都總係覺得差少少, 可能係我太奄尖... 如果度埋公主個位先係咪會好啲?... 太遲了, 嘢已瀬,無買extra絲帶, 阿囡話OK, 咁就咁算啦。

我實在唔鍾意整一模一樣嘅嘢，不過有啲嘢係要一對好啲... 攪掂！

基本夾

為我跟住落嚟嘅projects做準備, 將原本銀色光禿禿嘅夾包好絲帶先, 再諗諗整乜好...

Princess Rapunzel take two

為咗我嘅聲譽, 點都要再整返呢個公主！

I love my colleagues

我:「今年我哋部門有無人攞長期服務獎呀?」

同事A:「有, 同事B囉, 拎十五年。」
我:「Wow, B, 15 years, you might need to make a speech!」
同事A:「Yes, say something like "I love my company".」
同事B:「Sure, I can say "I love my company".」
同事A:「Say something like "I love my job".」
同事B:「Sure, I can say "I love my job".」
同事A:「Say something like "I love all my colleagues".」
同事B:「Well, I can only say "I love some of my colleagues".」
我:「Sure, you can say "You love all your colleagues".」













同事B:「"Definitely not everyone".」
我:「For some of them, you love their absence".」

三文魚

夜晚有我哋好鍾意食嘅三文魚鮫...
囡: 「花文魚係咪好有益架?」
我:「係呀, 三文魚係好有益架 。」
囡 (奸笑): 「我係話花紋魚喎, 你有聽過花紋魚咩?」
我:「....」

橡根手鍊 take three

呢條跟video教學, 我睇住阿囡自己整, 我剩係幫佢收尾, 我估我應該好快可以恢復自由, YEAHHHH!!

橡根手鍊 take two

呢兩日俾阿囡捉住要整整整, 要教佢鈎吓, 如果唔係, 我咪好唔得閒!

好彩佢終於都學識少少鈎嘅技巧同原理, 呢一個好大部份係佢鈎架。

橡根手鍊

整返件好樣少少嘅作品, 等阿囡可以show吓俾同學睇, 呢條佢負責放橡根, 我負責鈎。

Princess Rapunzel...續

我：「呢個公主遠睇就靚，近睇其實都好醜樣。」

囡：「但係你嗰個遠睇同近睇，都係好醜樣！」

我：「....」

我：「得啦，得啦，拆咗再整過囉！」

Princess Rapunzel

呢期個個玩織橡根, 連阿囡嘅老師同學都有玩, 咁即係我都要陪玩啦! 前幾日落order等送貨, 上網睇定教學先, 同阿囡一齊睇, 佢話要呢個Rapunzel公主, 跟住教學video做, 有幾難喎?! 好! 一口就答應!

點知...瀨嘢!... 醒起譚炳文首歌...

唔係入門基本步, 鈎咗幾次都錯, 到明白咗又發現需要嘅橡根顏色唔夠, 除咗黑色同粉紅色, 其他全部唔夠! 點算?! 無理由呢個時候放棄卦?! 咁咪用差唔多嘅顏色囉, 唔會好覺架啫... 唔夠紫色, 咪用藍色囉; 唔夠黃色, 咪用白色囉; 唔夠肉色, 咪用淺啡色囉....

結果...

面目全非到, 連阿媽都唔認得, 真係好樣衰呀！哈哈!