花店髮夾 take two

每隻夾用少少絲帶, 花店舊絲帶可能仲有好幾take, 哈哈!
我應該係中咗Handmade毒, 唔加個Handmade字樣唔安樂。

心心髮夾

以前買落唔少絲帶, 終於可以用得著, 呢個用咗白紗絲帶同深紅色白點絲帶, 再加個心心, 效果都OK喎, 後面加咗Handmade字樣架。



紅葉髮夾

整完花想整吓葉, 好似整得太肥, 好彩阿囡戴起又好似幾OK。

Bow 髮夾 take two

我:「其實隻夾細細隻, 都幾cute呀, 仲好有Hello Kitty feel。」
囡:「我都唔鍾意Hello Kitty。」
我:「你下次咪叫我幫你換Mac Donald啲Hello Kitty公仔!」

Bow 髮夾

阿囡竟然要求剪短頭髮...
我:「咁係咪俾晒啲髮夾我?」
囡:「唔係, 我前面可以夾, 左面右面都夾得, 少啲頭髮都紥到辮。」
我:「...」

OK, 整個bow髮夾俾佢襯吓個新髮型, 今次連個夾後面都修飾得幾好添!

菠蘿炒飯

菠蘿炒飯有埋個菠蘿, 賣相好正, 食完...
我：「啲人話個菠蘿會翻用, 係咪應該整爛佢呢?」
同事好認真：「你千祈唔好呀!」
我：「Why 呢?」
同事：「唔整爛下次仲有機會食翻自己呢個, 整爛咗就一定食人哋嗰個。」
我：「... 」

塗鴉酒杯

朋友俾咗幾張小朋友塗鴉變成真實玩具嘅相嚟睇, 真係勁得意喎!

諗諗吓我都試過將阿囡嘅塗鴉印上個酒杯度... 點解同原本個塗鴉唔一樣架? 因為唔易整同唔夠時間囉, 三個人變成兩個人, 戴眼鏡變咗戴contact lens, 哈哈!

 



梅花髮夾

阿囡同學生日會, 真係唔知買乜做禮物好, 整咗呢隻夾, 阿囡好欣賞, 但送俾人喎, 夠唔夠靚呀?
仍然唔知點可以rotate張相...

最怕改壞名

排隊等玩「睇醫生」遊戲...

醫生：「小朋友, 你個朋友仔叫咩名呀？」
小朋友：「gisssiili病。」
醫生：「係呀,有病呀,咁佢叫咩名呀？」
小朋友：「giss sssi li 病。」
醫生：「知道你有病。」
小朋友：「唔係呀, giss sssi li bear。」
醫生好大聲：「吓! 知道你有病?」

隔離醫生 ：「可能係叫Grizzly Bear...」

阿醫生真係笑死晒附近嘅人, 我諗返都想笑, 哈哈!

答錯車

爸爸: 「邊個小朋友同你一齊坐校車?」
囡: 「我自己坐架喎, 隔離都無人。」

妙問妙答, 九唔搭八...

攬枕

囡:「我個Mickey攬枕呢?」
我:「喺我呢度, 咁你俾返個蘿白攬枕我啦!」
囡:「爹哋, 俾返個蘿白攬枕老婆。」
我:「....」

玫瑰連葉髮夾

呢朶玫瑰壓平咗, 望落都仍然立體, 啱晒俾阿囡自己夾! (唔該唔好再拎我嗰幾隻!)

詭異事件

通常一班細路去放電, 就係媽咪們嘅吹水時間...
媽咪A:「呢排屋企好詭異, 阿囝玩具裡面, 無端端多咗部車仔, 一模一樣架喎。」
媽咪B:「可能返學校同學仔送? 呢期興送來送去, 放學返嚟多樣嘢唔奇。」
媽咪A:「唔會啦!」
媽咪C:「可能生日會, 人哋送嘅禮物呢?」
媽咪A:「無可能嘅, 阿囝嘅嘢, 我一定知架嘛!」
我: 「咁不如放張一千蚊紙喺嗰度啦。」

雙色雙玫瑰八字夾

呢個八字夾好似幾得意, 以爲夾唔到好多頭髮，原來唔係，扎部份或者成把扎晒都得架， 又幾好喎。呢兩朶花整完拆過再整, 之前整得唔夠靚, 改咗再整埋後面高貴晒 (又係自己覺得... ), 已經成爲咗我嘅新寵，呵呵!

姐姐回鄉假

我一向都話我家工人姐姐係有錢人, 返到山卡拉屋企都仲有whatsapp, 我擔心佢一去不返, 應該係可以理解嘅...

太陽花髮圈

呢排個天日日都係灰灰暗暗, 今日終於有太陽啦, 太陽花可以出洞!
呢個整完送咗俾阿囡嘅同學啦...

吹頭

同事A：「同事X個女已經係中學生啦, 洗完頭仲係坐低俾工人幫佢吹頭。」
同事B：「吓! 十幾歲啦喎, 咁大個都唔自己吹?!」 
同事C：「好奇咩, 我個女都係工人幫佢吹架。」
同事A：「....」
同事B：「....」
我：「唉呀!」
同事C：「咩事呀?」
我：「早知我都叫我工人幫我吹頭啦!」
同事A：「....」
同事B：「....」
同事C：「....」

皇冠

呢個係半失敗之作, 唔係個皇冠本身, 而係因為整成個心口針, 因爲心口針有重量, 掛上衫度個皇冠挺唔起....

單色小花長髮夾

原來又長又幼嘅髮夾都唔易攪喎，襯來襯去，好似整一排小花都幾好！
打橫變咗打直, 唔識轉幅圖添!

膠碗

隔離屋小妹妹過嚟食飯, 阿囡居然主動借咗自己心愛嗰個膠碗俾妹妹。
我:「好乖喎, 讓妹妹用膠碗, 你自己用玻璃。」
囡:「係呀, 我驚佢打爛我隻碗呀嘛。」
我:「....」

假買賣

囡:「你賣咗個Mickey Mouse攬枕俾我啦。」
我: 「賣唔賣你都用緊架啦, 借俾你咪一樣。」
囡:「唔好啦, 你賣俾我啦。」
我: 「你都無錢。」
囡:「我有錢呀。」
我: 「你邊度有錢?」
囡:「我有假錢呀嘛。」(吓? 假錢!咁都得?)
我:「咁我假賣俾你啦。」

同學媽咪

囡: 「點解我無細佬同妹妹?
嘩! 最怕呢種問題...
我 (輕描淡寫): 「係呀, 無呀!」

囡: 「點解你唔係生小丸子 (同學花名)?」
俾佢考起, 唔知點答...

囡: 「因爲你唔係小丸子媽媽, 小丸子媽媽生小丸子, 你生我, 你係我媽媽呀嘛。」
我 :「.....」

外套

天氣好凍, 阿囡話公仔無長袖, 咁又試吓整囉! 呢件外套個pattern係for小朋友, 大人著好似怪怪哋。

Cardigan on Rebecca...

新版灰姑娘

我好多作品都係邊整邊諗, 要整返同樣嘅嘢, 對我嚟講係絕對有難度, 跟instructions整嗰啲就得!不過因為係完全盲目跟instructions整, 整完呢對鞋, 四個models都唔啱著...

於是要好似試玻璃鞋一樣, 去揾啱著嘅...

有人隻腳太大...

有人隻腳太細...

最後都真係要公主先啱著, 哈哈! 不過呢個唔係Cinderella, 係Sophia走佬公主。

小心騙徒

晚飯有碟餸有葱, 我覺得幾好味, 阿囡平時唔鍾意食菜, 我叫佢試吓, 不過佢食咗一條話唔好味唔再食, 於是我用返細個時阿媽會用嘅方法...
我:「食葱聰明啲喎。」
囡:「你蠢食咗係咪會聰明返。」
我: 「...... 」答係有c, 唔係又c...
轉頭阿囡自己夾舊雞, 然後話:「食雞會聰明啲。」

我即刻諗起小心騙徒嗰個宣傳短片, 佢哋越嚟越精, 無咁容易呃架啦...

陪訓

我:「今晚同邊個訓?」
囡:「同媽咪訓, 因為爹哋話唔得閒。」
我 (怒!):「爹哋唔得閒就同媽咪訓, 媽咪都唔得閒, 你係咪自己訓?」
囡:「唔係! 同姐姐訓, 姐姐唔得閒就遲啲, 等姐姐得閒先。」
我:「...」

囡:「自己訓, 會有怪獸架。」(梗係睇得太多"怪獸公司"啦!)

我:「你唔記得怪獸怕人架咩, 唔好話怪獸, 我都怕咗你啦。」

 

重組句子

今日搭車經過見到呢個牌...

點解寫得咁奇怪嘅?「陳家」溝「陳氏」? 陳家係男家, 陳氏係女家? 陳姓男士追到某女士變成咗陳氏? 做招牌記念一吓咁攪鬼?

.....再諗吓先, 應該係「陳家溝」「陳氏」喎! (Oh, 汗....) 原來最奇怪係我, 可能呢排同阿囡玩得太多重組句子, 哈哈! Sorry Sorry!