有嘢講

今日同事A, B 去同喺其他國家嘅C, D, E, F開regular tel-con meeting, 其中B永遠只會開會, 從來唔會做嘢, 亦唔會發言, 呢樣係人人都知嘅事, 點解可以咁, 咪因為係黃馬褂囉...

我坐得近meeting room, 開完會...
同事A: 「係咪又聽到我把聲?」
我: 「咪玩啦, 次次都係嗰幾個發言架啦。」
同事A: 「今日B有講嘢呀!」
我: 「Hello 同 Goodbye 呀嘛 。」
同事A: 「唔係, 係Merry Christmas!」
我: 「....」

泳池事件

第一日上游水堂, 話喺閘口放低小朋友, 游完會帶返出嚟, 但其實都要幫佢沖涼架啦, 點可能閘口接呢?!

去到閘口人山人海, 偏偏唔見我哋間泳會, 等咗一陣, 終於有個著住潛水衣嘅, 應該係教練嘅女仔出嚟閘口接學生, 嘩! 有成十幾個人跟住佢! 出泳池前要過花灑, 阿囡喊住唔敢過, 遲咗一陣跟唔到教練, 其實佢繼續前行就得, 我都見到個教練, 不過佢喊住唔去, 我好狼狽咁去拎把遮過花灑, 帶佢去返教練度, 但教練已經落咗水, 竟然無發現少咗個小朋友?! 我即刻鬧咗教練幾句, 然後又鬧咗阿囡幾句, 跟住望吓個環境, 其實幾危險, 個個小朋友都係得四到六歲, 一個教練睇五個唔識游水嘅小朋友, 另一個教練更加睇十幾個識得游吓嘅, 萬一有幾個掛住玩, 跌落水唔知救邊個?! 以後我一定跟去池邊睇上堂!

到差唔多落堂, 有個家長好嬲咁嚟到, 話四歲個仔喺閘口跟咗教練入嚟, 但唔見咗, 大家個反應梗係好驚啦, 真係驚個細路浸陣。

家長:「我個仔唔見咗, 跟住你入嚟架喎。」
經驗教練(喺泳池裡面), 有少少詐儍扮矒樣:「跟邊個呢?」
家長指住助教(都喺泳池裡面):「佢呀, 閘口交俾佢架!」
經驗教練:「你記得個小朋友有無跟住?」
家長:「你無數人架咩?」
家長:「你無點名架咩?」
家長:「唔見咗成半個鐘頭啦, 佢得四歲。」
家長:「我係咪應該報警?」
家長:「你快啲揾負責人, 唔係要我打吓嘩?」(吓, 兩個都喺泳池裡面, 唔通教練有個防水功能電話?!)
我:「你不如揾泳池職員幫手揾咗個仔先啦。」(真係好驚個細路喺池底...)
個家長無理, 繼續鬧爆教練.... (其實佢應該係block晒所有「雜聲」, 人哋講乜都入唔到耳! 算吧!)
經驗教練:「得, 我幫你處理, 其他同學如果家長喺度嘅, 早少少落堂。」
跟住家長去咗更衣室揾仔, 好快拉住個仔出嚟... 繼續鬧爆教練(似乎要用佢嘅音波功令教練吐血為止)... 我同阿囡就人啦。

其實呢位家長係為乜, 同想得到啲乜呢?

診所低能奇觀... 續

我其實好想問... 但我估問完一定上得診所低能奇觀...

我: 「阿姑娘, 呢度寫住每日4次, 早、午、晚餐後及睡前用..., 我唔食早餐架喎,咁係咪唔食得藥呀?」
我: 「阿姑娘, 呢度寫住每日4次, 早、午、晚餐後及睡前用..., 我食完晚餐差唔多訓架啦,咁係咪一次過飲兩格呀?」 

診所低能奇觀

平時睇開診所低能奇觀, 估唔到可以親身經歷…

我如常打定電話去家庭醫生度book時間掛號, 都知道去到都係要等, 好彩去到時得一、兩個人, 好快睇完等攞藥 (例牌有排等)。跟住不停有人入嚟, 好快已經有六、七個人坐低咗，突然有位大嬸（可能五十幾嵗）入嚟… 

大嬸大大聲加毫無禮貌同姑娘講：「我好趕時間架!」

跟住坐喺診証室門口, 我嚟過無數次, 從來無發覺嗰度有張凳!  我心諗呢位大嬸輕功果然厲害… 諗諗吓應該係坐咗喺書架。

姑娘無理佢，周圍無聲無色， 突然大嬸又問：「醫生未返呀?」

姑娘輕描淡寫：「唔係, 醫生睇緊症。」

大嬸：「我好趕時間架!」

我心諗你又知其他人唔趕時間?!

姑娘無理佢，下個叫名唔係大嬸。

姑娘用好溫柔嘅語氣同大嬸講：「再叫多一個, 之後到你架啦。」

其實估計大嬸係照排, 剩返嘅人同我一樣係等攞藥, 姑娘EQ真係好高!

波子棋

囡:「我行先。」
我:「好呀, 你咪行先囉。」
囡:「都係你行先啦。」
我:「嘩! 得一粒咋喎, 得一粒就叫我行先。」
囡:「你叻啲呀嘛。」
我:「...

唔想做

大概兩年前幫襯過ABC公司整company event 嘅外套, 本身訂嘅量唔多, 當時擔心未必有好多公司肯接單, 跟我張單嘅A小姐有少少口音, 但跟得非常好, 我好滿意佢。伊家想再整,基本上requirements都同上次差唔多, 於是send個e-mail去拎報價, 好快收到個自動回覆, B小姐已離職， 請聯絡xxxxxxxx(電話) / yyyy.com(電郵), 我以前係搵A小姐喎, 公司電話無變, 呢個yyyy.com電郵都喺我個copy list，應該OK啦... 隔咗兩日無消息, 打去xxxxxxxx問吓先, 有位男士接聽, 講無口音純正地道廣東話。

職員：「ABC公司。」
我：「你好，我以前幫襯過你哋架,前兩日send咗個e-mail拎報價, 未有消息, 想請問係咪收唔到呢?」
職員：「B小姐無做架啦。」
我：「我以前搵A小姐架喎。」
職員：「A小姐都無做架啦。」

我：「我都有copy去yyyy.com, 麻煩你睇吓收唔收到。」
職員：「咩名架?」
係咪想問我電郵係乜呢?
我：「我e-mail係zzz.com。」
職員：「哦, 你就咁send張相嚟問價,所以無人覆你。」
吓?!係我錯咩?！正常有查詢都會主動同個potential客clarify吓卦...(汗!)

我：「呢張相係我以前喺你哋個show room度影架喎。」
職員：「咁應該係好耐之前啦,見張相個樣,我哋啲嘢都唔係咁擺嘅。」
我：「大約兩年前啦。」
職員：「係啦,好耐之前。」
吓?!兩年前唔係廿年前,啲外套來來去去咪咁上下樣,可以有幾前衛呢...(汗!)

我：「哦,咁如果咁樣嘅外套,同我要嘅數量,大約要幾錢一件呢?」 
職員：「你張相件風褸有内胆,大約要五百蚊件喎!」 
我：「咁如果剩係要風褸呢?」 
職員：「二百三十蚊起, 係起呀!」 （個「起」字好大聲）
又真係幾貴, 不過咁快就覺得我俾唔起??!! 公司錢唔係我啲錢喎,而且我都話幫襯過...(汗!)











職員：「要睇用邊隻料同要印幾多個logo。」 
我：「咁我上去你哋show room睇睇先啦。」
職員：「我哋大厦維修,啱啱整到我哋呢層,要整一個禮拜左右,啲嘢好亂,你要睇我都拎唔到俾你。」
我：「你哋係咪仲喺XYZ區?」
職員：「係喺XYZ區。」  
正常都會講一次地址啦...(汗!)
我：「咁我月尾或者下個月嚟會唔會好啲呢?」
職員：「大約一個禮拜後應該得啦。」  
講一個日期好難咩?! 唔sure咪叫我嚟之前再打去confirm囉?!...(汗!)
我：「咁或者我之後再打嚟。」
職員：「係啦。」

呢位職員無講自己係邊個, 唔算好無禮貌, 當然亦唔係好有禮貌嗰隻, 問一句答一句, 俾我感覺係唔想做我生意, 香港人點解變成咁?!

實習生

同幾個朋友吹水, 講起實習生嘅奇事, 確實發現自己同社會脫節, 我一向以為實習生係刻苦耐勞嘅平價員工...













朋友:「今日開會over run, 呢度大家點咗午餐, 唔該你去xx茶餐廳買外賣返嚟。」
實習生:「哦!」
一路見到實習生無動靜, 朋友忍唔住問...
朋友:「差唔多到午飯時間, 你仲未去買?」
實習生:「等等, 轉頭!」
果然轉頭, 實習生嘅家傭姐姐送上外賣...
實習生:「到啦!」
朋友:「....」

唔小心

前幾日阿囡放學長睇電視， 俾我鬧爆, 今日放工夜返, 發現佢無執書包,好彩做晒功課!
囡：「我今日好少睇電視。」
我：「我無話唔可以睇電視, 但係要做完功課, 執好書包,同溫習咗先得。」
囡：「係呀, 我做晒先睇電視, 睇咗一陣咋。」
睇到連麵包超人首日文歌都識唱, 好難相信係睇咗一陣....
我：「今日默書識唔識呀?」
囡：「啱晒啦!」
我：「吓?! 默完都未派, 你又知?」
囡：「我一早就知架啦。」
突然咁有自信?!
我：「OK, 但你無執書包嘅? 未執就睇電視?」
囡：「哦,我唔記得執書包,唔小心睇咗電視。」
我：「...」

陪午膳日...續

又去到學校陪阿囡午膳, 佢隔離個女同學, 一見到我就不停同我講嘢, 我行去邊佢都跟住我, 介紹完學校、課室、老師、活動, 就講屋企, 佢屋企人無嚟, 唔知嘅會唔會以為我係佢阿媽??!!
到夠鐘要走, 佢有啲依依不捨... 
同學:「聽日見呀!」
我:「吓, 聽日無得陪食飯喎, 得兩日之嘛! 聽日我唔嚟, 唔見架啦!」
同學:「係喎, 不過八月二十日係家長, 到時你嚟啦, 我哋又見啦!」
我:「吓, 八月過咗啦喎!」
同學:「講錯咗, 係九月二十日, 到時再見啦!」
我:「...」

放學返到屋企,
我:「我覺得坐你隔離個同學好鍾意我, 佢不停同我講嘢。」
囡:「梗係唔係啦, 佢知你係我媽咪先同你講嘢。」
我:「...」

陪午膳日

可以返學校陪囡午膳, 真係好興奮！去到班房可以坐自己個小朋友附近, 我去到無幾耐, 前面位家長就"隊"佢部強國手機俾我...

家長：「係咪影咗架啦？」
我望一望...嘩! 高炒, 影咗小朋友個頭頂同見到佢食緊個嘅飯盒有乜餸....
我：「係呀。」
家長：「想將張相發俾佢阿爸阿媽睇呀, 你幫吓我呀。」
全部簡體字, 我唔多識，不過有啲icons都係一樣嘅...
我睇住埋象形文字：「我用whatsapp, 我唔知你用乜嘢發喎！」
家長：「大陸用微信架。」
我:「微信?! Wechat?! 喺呢度呀。」
我想俾返部手機佢, 但唔成功...
家長：「我睇唔到呀,有個叫"家庭組", 你幫我發啦，我唔識呀。」
網絡好慢,張相等咗好耐都未成功發出。
家長：「幫我睇吓係咪發咗?」
我:「Load緊,你等吓啦。」
然後無限loop....
家長：「幫我睇吓係咪發咗?」
我:「Load緊,你等吓啦。」
Repeat loop
夠鐘！Shiiiiiiit... 攪到我無時間同我個囡親子午膳喎! 依家諗返好懷疑呢位家長係咪真係需要人幫...
以後記住唔好「厚多士」... 好彩有兩次陪午膳日, 下次咪再中伏!

女上司

同事:「依家請人真係難!」
我:「啱啱見嗰個點呀?」
同事:「轉工轉得好密吓, 第一份話因為時間長, 第二份話因為太遠, 之類之類, 然後最近一份個原因好攪笑。」
我:「答乜嘢呢?」
同事:「佢話原因上司係女人, 我一路仲等緊佢會再講啲乜, 但係『女上司』已經講晒。」
我:「真係講晒啦喎, 自己係女人, 都覺得女上司好難頂。」
同事:「..... 」

改造牛仔裙

朝早執櫃桶時發現呢條裙, 我完全無印象有條咁樣嘅裙, 居然又可以僅僅著得落喎, 但以我呢個年紀, 點可能著佢出街....

阿囡見到條裙話好鍾意, 梗係因為有Mickey同Minnie啦, 一於改裝俾佢著!




















仲可以整隻髮夾, 不過望落麻麻, 要排隊等再改造...

閃石絲帶髮夾

真係好大圈絲帶...

整吓簡單嘅髮夾, 效果都OK喎!

小三

朋友A:「老闆件小三，吓吓當正自己係老闆娘, 真係超難頂！」
朋友B:「無辦法, 同7-11一樣, 總有一件喺左近。」
朋友A:「真係好難明白老闆同老闆娘, 老闆娘有樣有身材同有腦, 但老闆娘又似知道小三而無出聲。嗰件小三無樣無身材, 最慘係無腦, 同佢一齊做嘢嘅都嘔出幾桶血, 係咪每個男人都鍾意有個蠢女人喺身邊, 先覺得自己特別醒過人?!
朋友B:「哪, 呢句真, 你終於識諗啦... 平時公司邊有咁多問題先得架?! 就係多得有個小三整鑊粥, 老闆先有機會攪返掂, 英明神武幾多呀, 男人要出風頭嘛！」
朋友A:「....」
朋友B:「而老闆娘呢..."男人吃米飯吃多了，總想吃點麻辣煲，雖然知道那是垃圾，但就是管不住自己..."」
我:「朋友B, 你果然係高人, 你好有potential做老闆娘! 」